إسمعينى

إسمعينى.........
منتى لازم تسمعينى
إسمعينى وحاولى مره تفهمينى
ياللى بانيه جوه قلبى سور كبير
ياللى إسمك إسم غالى ومش قليل
إسمعينى وافهمينى
 وحاولى مره تعيشينى
عيشينى فى حلم أحلم.......
إنه يوم هيملى عينى

ــــــــــــــــــــــ
صعب إنى يوم أشوفك غصب عنى
بورتريه زل وقساوه عن يمينى
وعن شمالى بحر تايه بين ظنونى
بحر ماله شط غير دموع المحبطين
اللى يوم ماحبوا فيكى
قوم ترابك يبقى طين
تراب وميه سدو عين الحلمانين
سدو كل طريق لحريه بلدنا
وفضلتى سامعه
وفضلتى حاسه
طب يفيد بايه إحساس السجين

ــــــــــــــــــــــ
روحتي فين وضعتي منى
مش لاقيكى بعيده عنى
بعد عمر بحاله وانتى
ناسيه كام عمري الليلادى
ــــــــــــــــــــــ
إسمعينى.......
مانتى لازم تسمعيني
إسمعينى.......
وأوعى مره في يوم تجينى
وتقوليلى.....

 إنسي حلمك
دا اللي حلمان إنت بيه
وأوعى يابنى فى يوم تفكر
إني اقدر اشتريه
مشتاقين قبل منك
مشتاقين ليوم أمان
غصب عنى وغصب عنك
غصب عنى وغصب عنك
ــــــــــــــــــــــ
 هتيجى يوم وهتسمعينى
وفوق ترابك هتشيلينى
أصل إللى بينا شئ كبير
شئ مالوش غير معنى واحد
مهما بينا طال الليل
هتيجى يوم وهتسمعينى